الخميس، 15 مايو، 2008

قرااااااار....


حيث ان طلبة وطالبات كلية الفنون التطبيقية جامعة حلوان

من الطلبة الخارقين

عقليا وجسمانيا

فقد اتوا من كوكب غريب لا نعرف له اسما

وقد اجرينا عليهم تجارب مكثفة فى الترم الاول

واجتازوها بنجاح

لذاقررنا اجراء تجارب اخرى
ووضعنا لهم جدولا خارقا

18-19-20-21
اربع تقييمات متتالية

ليس هذا فحسب
25-27-29
ثلاث امتحانات نظرى منعرفش عنهم غير اساميهم


ثم تتوالى الضربات فوق رؤسهم

يومين ثم ثلاث ايام لغاية 18/6

ثم نطلق سراحهم

وورونا شطارتكو بعد اسبوعين فى التدريب الصيفى!!!!!!!!!!!!ا

اجازة .. دراسة

مفيش رحماااااااااااااااااا

ساوافيكم بالتهريج اللى بيحصل فى التقييمات برضو

دعواتكم جدااااااااااا

بفضل من الله

تمت اول اربع تقييمات

ادعوا ربنا يثبت النظرى فى دماغى


هناك 41 تعليقًا:

خبيب يقول...

"احتمال" يكونوا قرأوا اسم المدونة ..

فقرروا قياس قدرتكم الحقيقية على الـ"احتمال" !

---

أعانكم الله ووفقكم وبارك فيكم

حـــــدوتـــــة يقول...

السلام عليكم
اختى العزيزة الموضوع مش فى جدول الامتحانات
النظام التعليمى بتاعنا من افشل الانظمة فى العالم
وبيخرج طلبة عندهم اعاقة ذهنية
بس بالرغم من كل ده تعتبر سنين الكلية من اجمل سنين العمر
حولى متشليش الهم من دلوقتى
عيشى حياتك وافرحى على قد ما تقدرى فى ايام الكلية
لانك بعد ما تتخرجى هتشوفى الحياة بجد
وهتدخلى المفرمة وتنضمى الى فريق كبير من الشباب المفروم
وتقولى ليت الزمان يعود يوما

سلالالالالالالالالالالالالالالالالالالالالالالام

حاول تفتكرنى يقول...

جميل ان نتعب ، وجميل أن ندور فى دائرة نظن أنها لن تنتهي
وعندما تنتهي ، نري ونشعر بما فعلناه
أنه الأجمل

اعانك الله

تحياتي

shaimaa samir يقول...

الاخ خبيب
اضحك الله سنك
ههههههههههههههههههههه
جزيت خيرااااا كثيييييييييرا


حدوته
لالالا
والله يا اخ حامد انا مبسوطةفى كليتنا بالرغم من كل شىء
كليتنا فعلا رااائعة
واناتعلمت كتير فيها
اللى عايز يتعلم بيتعلم بجد
بنت عمى كانت فيها وزى ما دخلت زى ماخرجت حتى متاثرتشى بذوقها فى شراء الحاجة وفرشت بيتها كاى بيت تقليدى
ماعلينا يعنى
وننتظر المفرمة بعد السنة الجاية
مع انى مش عايزة اتخرج وهتلاقوا تدوينات السنة الجاية فى نطاق مش عايزة اتخرج
(عياااااااااااااااط)

الاخ حاول تفتكرنى

جزاكم الله خيرا لكلماتك الطيبة
تنزل بردا وسلاما
ان نرى ونشعربما فعلناه
وبالاخص الكليةعندنا لاننا بنعمل مشاريع فطول السنة تصميمات وتجارب ودلوقتى احنا فى الفاينل خلاص بنعمل البريزنتيشن ببص على الشغل بنسى كوول حاجة فعلاا
وبالاخص مادة رسوم متحركة لانها بجد بتاخد وقت طويل ونتيجتها محدش بيحس بيها لانها لا تتعدى الدقائق وتكون مجهود شهور
الحمد لله


اسالكم الدعاااااااء
وهنزلكو باذن الله المشاريع

و القادم....أجمل يقول...

ربنا يوفقك يارب و ييسر لك أمرك

إن شاء الله خير

و القادم....أجمل

:D

جني يقول...

الشيماء
ونحن في البكالريوس قوجئنا بدكتورة لا تقرر كتاب لدراسته وقالت إن مرجعنا في المذاكرة المحاضرات ثم مكتبة الكلية فهاج المدرج وماج فلم نتعود على ذلك وتحت ضغط الطلبة والطالبات الشطار منهم والشاطرات قررت الدكتورة تحديد كتابين مع محاضراتها ..
وأنا لست معكم في طرحكم .. فطالب الجامعة لابد أن يكون مبتكر مبدع باحث .. هذه الطرق في التعليم هي التي تخرج لنا علماء وليس مجرد حفظة للعلوم سرعان ما ينسوا ما حفظوه ..
اجتهدي يا شيماء وأبدعي وربنا معاكي يوفقك ..
وتحياتي
said

واحدة مفروسة يقول...

ربنا معاكى و بالنجاح ان شاءالله

nonoymm يقول...

ههههههههههههههههههههههههههههههههههههههههههههههههههههههههههههه
مش قادرة كفاية
ايه دة يا حبيبتي ربنا معاكي
ادي اخرة ام مكتب التنسيق وسنينه والتفوق وايامه
ربنا معاكي يا حبيبتي ويكرمك باذن الله
بصي الموسيقى اللي انتي حطاها دي انا وزوجي نعرفها وحسينها مش غريبة علينا بس ناسين دي بتاعة ايه قوليلي علشان عاوز احملها عندي يا ريت لو تبعتيلي الكود بتاعها احتفظ بيها
اصلها حلوة اوي بحبها
ربنا يكرمك يارب
تحياتي

shaimaa samir يقول...

الغالية والقادم اجمل
انتى الاجمل
سعدت بتعليقك على ادراك لاننى انتظرته كثييييرا
ودعواتك الدائمةيا حبيبتى
احبك فى الله

***************************

الاخ الفاضل جنى

وأنا لست معكم في طرحكم

طرح ايه؟؟!!!

حضرتك لو قرات ردى على التعليقات المضيةانا بحب الكلية وبستفيد منها هو بس نوع من الضغط الامتاحنى والجدول بصدق مزنوق جدا
واحنا بناخد14 مادةمنهم 7 او 8 عملى منهم مادتين2*1 يعنى عملى ونظرى حاجة كدة
لكن الواحد بيحاول يخفف عن نفسه
ودعواتكو جميعاااااا
وكليتنا اساسا بتعتمد على الابتكار والابداع لاننا مصممين بنعمل تصميمات جديدة
فلاازم نفكر ونبدع عشان نرتقى ونتفوق
وفقنا الله جميعا

shaimaa samir يقول...

الحبيبة
واخدة مفروسة
بدايةمرحبا بك فى المدونةاولى زيارتك لى
سعدت بها كثيرةيا حبيبة
وشكرا لدعواتك الجميلة
دمت بصحة

***********************

نونو
ههههههههههههههههههههه
انتى سكروعسل
فطست على روحى من الضحك حسيت انك روحتى جبتى زوجك مثلا وهو بيقرا الجرنال وتقوليله تعالى بس بسرعة اسمع الموسيقى دى
هههههههههههه
بصى يا ستى هى لعمر خيرت بتاعة ايه معرفشى لان صحابى عندهم نفس شعورك بالظبط(وش مكسوف)
امالين كالتحميل
هوعند واحدةصاحبتى لانى بعيدعنك كنت جاهلة معرفشى ازاى احط الكلام ده
فبعتهلها وادتها الباسوورد (صديقة حميمة) وحطتلى الموسيقى اول ماهاخده منها هجبهولك لغاية مدونتك
ويالا تكاليف الانتقالات والبنزين الى غلى على حسابى ولايهمك ابقى اعزمينى على عصير قصب عشان بحبه
بس معلشى مش دلوقتى عشان هىمشبتدخلخالص
انا اللى فاشلة وبستهبل
دعواتك اوىىىىى

مجداوية يقول...

السلام عليكم

وارينا القوة يابنى انت هو
من عنده مروة وعملى فتوة

وريلهم القوة بقى
عالم بتاعت شهادات صحيح
ربنا يقويكى وفعلا زى ماقال اخونا حدوتة انت بتعيشى احلى ايام عمرك وكل الضغط ده ولا حاجة جنب تحمل المسئولية الحقيقى انا وقت ما كنت فى سنك كنت باقول زيك بالظبط ولما ان شاء الله تكونى فى سنى حتقولى نفس الكلام بتاعى لواحدة شاطرة بتشتكى من ضغط كلية الفنون التطبيقية اللى معندهاش رحمة ولو سألتى خريجين أول دفعة عندك حياكدوا كلامى
الأيام دول
استمتعى بهذا الضغط لنك بعد كده حتدخلى حلة ضغط بريستو سب مقاس 360اسمها المسئولية
ربنا معاك غاليتى

مجداوية يقول...

السلام عليكم
يا زهرتى انتى نمتى ولا ايه اقرأى التعليق عندى ونفذى اللى فيه وصحصحى معانا

dr.Roufy يقول...

ههههههه
ربنا معاكي ياشيماء بجد
ماتخافيش حبيبتي انتوا قدها وهاتعدوا منها
أختك ياما اتعمل فيها في معسكر التعذيب الشهير بطب عين شمس
وكل مرة ولمدة 7 سنين كنت اقول لا خلاص كدا هانهار ومش مكملة
لكن كملنا واتخرجنا وأدينا اهو بنستكمل مشوار التأهيل في الدمرداش
انا باقول لك الكلام دا بجد علشان تخلي عندك أمل
:)
وتشدي حيلك كدا..بس شديه بالراحة شوية
ربنا يوفقك يا جميلة ويهون

rovy يقول...

السلام عليكم
عوده محموده للكتابه لأنك كنت وحشانا
ربنا معاكى وان شاء الله يقدرك ويوفقك
دمت بخير وسعاده وفى رعاية الرحمن
باركك الله يا فنانتنا
خالص تقديرى وتحياتى
وطبعا دعواتى
rovy

جني يقول...

الشيماء
طرح أيه .. ( علامتان استفهام وثلاث للتعجب ) هل هي دليل على الزعل ؟
بداية أرجو ألا يضيق صدرك من رأي يخالف رأيك طالما كان الحوار لا يخرج عن حدود أدب الحوار والحمد لله ..
ثانيا عادة عند تعليقي لا أقرأ تعليقات الآخرين أو الرد عليهم حتى لا يتأثر تعليقي على الموضوع الأساسي للبوست وقد يكون من الأفضل قراءة التعليقات والردود للمساهمة بمعلومات جديدة للنقاش وعدم تكرار التعليقات بدون فائدة ..
ثالثا قد يكون التعليق لإثارة معلومات لمناقشة الموضوع العام للبوست كما ذكرت في بداية تعليقي السابق ..
رابعا وأنا لست معكم في طرحكم فأسلوب الجمع هنا لتعظيم المخاطب بفتح الطاء..
وطرح إيه ؟؟!!! فقد أحسست فقد أحسست في كلامك بنبرة الضيق من امتحانات النظري التي لا تعلمين منهم غير أساميهم ثم موافاتنا بالتهريج اللي بيحصل في التقيمات ..
خامسا قد يكون التعبير قد خانني ولكنه لا يستدعي علامتين استفهام وثلاث علامات تعجب ..
أخيرا تعلمين أن مدونتك من المدونات الصديقة التي أحترمها وأقدرها كثيرا لموضوعاتها الراقية ..
ربنا معاكي يوفقك
تحياتي
said

بنات صاحبة الجلالة يقول...

ربنا معاكي يارب ويوفقك وتنجحي بامتياز كمان باذن الله بعدين مفيش حاجة بتجي بالساهل الواحد لازم يتعب في دراسته علشان يحس بالتعب هههههههههه ربنا يوفقك يارب ويسهلك الصعب ويوفقك الي مايحب ويرضي اللهم امين

لكي تحياتي

mostafarayan يقول...

جامعة حلوان اسوأ جامعة ممكن الأنسان يدخلها الحمد لله اني دخلتها وخرجت منها سليم
ربنا يكون في عونك

shaimaa samir يقول...

الحبيبة مجداوية
والله مستشعرة باللى بتقوليه من قبل مااكبر
ربنا يكرمك
دعواتك معاياجدااا

الحبيبة د روفى
ههههههههههه
ربنا يعينك
وممكن نيجى نزورك قريب جدا فى الدمرداش
دعواتك جدا يا غاليه


الحبية الغالية
روفى
انتى اللى وحشانى يا حبيبة والله
واخبار بناتك الحلوين ايه
دعواتك اوىىىىىىىى
احبك فى الله

shaimaa samir يقول...

الاخ الفاضل
جنى
انت تعلم ان حضرتك من اكثر الناس اللى بحترم رايهم وكلامهم جدااااااااا
فطبيعى يكون عند حضرتك خلفية انى مش هضايق ابدا
ثانيا لو حضرتك شفت ردودى
عمرى ابدامااضايق من حد مخالف لراى
مش انابجداللى كدة
ثالثا علامات التعجب والاستفهام وما تستدعيهم
انا دايما بحط حاجات من دى
قلتها او كثرتها ملهاش اى مدلول غير انى مش فاهمة مش (مضايقة)
رابعا انا استغربت من كلمة الطرح ومفهمتهاش ليه
لانى حسيت انى مطرحتش حاجة يتوافق عليها او ميتوفقشى
بمعنى انى بقولكو عندى امتحانات
بس بقولها بنوع من التهريج
الملغم بالواقع
عامة
جزاكم الله خيرا
ومعذرة

shaimaa samir يقول...

بنات صاحبة الجلالة
يا هلا بالاحباء
هههههههههه
ادعيلى متعبشى اوى طيب
لانى ضعيفة اصلا
دعواتك جدا معايا فعلاا

الاخ مصطفى ريان
الحمد لله
وربنا يكلل تعبنا بالخير
بس انا بقا
مش عايزة اتخرج بصراحة
انابحب الكلية برغم شقائها وتعبها
نورت المدونة
فهى اول زيارة لحضرتك

الافغاني يقول...

في فكرة عند بتوع التعليم ان الطالب المصري خارق للعادة

احنا مثلا في كلية طب بيدرسولنا منهج الدكتوراة ف البكاليروس
وابقي قابلني لو عرفت تم حاجة

الفارس الملثم يقول...

انا كان عندي اليومين اللي فاتوا دور برد تقيل شويه , ويدوبك النهارده خدت التوك توك بتاعي عشان الف بيه شويه ..

ربنا يعينك يا شيماء , ما هو التعليم برده تاديب وتهذيب واصلاح , واللي ما علمتهوش الايام والليالي تعلمه وزارة التربيه والتعليم

تحياتي
محمد

الفارس الملثم يقول...

هو صح الجامعات دلوقتي تبع اي وزاره ؟؟؟؟؟؟؟؟

arsenalwy يقول...

ربنا يكون فى العون

ياشيماء

عونك وعونا



مستنى اقتراحك على البوست الجديد

وادعوكى لوضع لوجو حملة وقف تصدير الغاز الى اسرائيل

ودة اللينك بتاعه
http://www.zshare.net/image/12105759293805bb/

rainbow يقول...

الصديقة الجميلة شيماء

اتمنى ان تمر فترة الامتحانات على كل خير ان شاء الله عليكم جميعا

دعائى الصادق لكى بكل خير

هدى

wael kamel يقول...

بصراحه الناس في مصر طيبين اوي يا خال
كله ساكت علي كل حاجه وراضي لازم انتوا كمان ترضوا بالأمر الواقع
وبعدين الناس كتر خيرهم التقييمات مواعيدها 25-27-29 يعني عندك 26-28 فاضيين بصراحه احنا شعب مفتري مش بنحس بالنعمه اللي احنا فيها

شمس بكرة يقول...

أهلا بالمخلوق الفضائي
أعتقد إن واضعي جدول الامتحانات من أصحاب العقول المستنيرة وأكيد هما كمان فضائيين وإلا جابوا الذكاء دا منين
أما عن سر كون الامتحانات ورا بعضها فده عشان تلحقوا تخلصوا امتحاناتكم قبل ما أسعار تذاكرالمواصلات تغلى تاني

عمر المصرى يقول...

السلام عليكم
متستغربيش يا اختى الكريمة
وابتسمى فأنتى فى مصر
بلد المعجزات والأشياء الخارقة
أفتكرت مشهد من فيلم خلى الدماغ صاحى لما العفريت كان صعبان عليه حالة الطلبة وبيعيط
ربنا يوفقكوا بس انا مش عفريت علشان كدا مش هعيط

جني يقول...

السلام عليكم ورحمة الله وبركاته

ت
ح
ي
ا
ت
ي

said

النجم القادم يقول...

ارحمى الطالبة شويه هههههههه

دعواااااااااتك امتحاناتى 26/5

بارك الله فيكى

ونعتذر عن التقصير فى متابعة كتابتكم

shaimaa samir يقول...

الاخ الافغانى
الحمد لله على كل حال
وفقنا وفقكم الله جميعا

الاخ محمد الفارس
التعليم برده تاديب وتهذيب واصلاح
ههههههههههههههه
نظرية برضو
جزيت الخير
وشفاك الله وعفاك

الاخ arsenalwy
وفقنا الله جميعا
وحاضر هحطه بس افضى شوية
ربنا يسترها

doctor mohamad يقول...

إيه ده؟ هو البوست ده مافيهوش نقاش و حرق دم ولا إيه؟؟ عايزين خناقة _عايزين دم .. >ملامح غاضبة< _ >ثم ابتسامة هادئة< .. ربنا يعينك.

shaimaa samir يقول...

الغالية الحبيبة
rainbow
جزاكى الله خيرا
نورتينى ودعائك الدائم الله يكرمك
وحشتينى بصدق

الاخ الفاضل
وائل كامل
خال مين بس..!!
احنابجينا فى مصر
احنافعلا مفتريين تقول ايه شعب ناكر للجميل بيعلمونا تعليم حكومى واحنا بنتنمرد ..
نورت

شمس بكرة
ههههههههههههههههههههههه
طب ورا بعضها وبرضو مش هنخلص بسرعة
بخلص فى شهر
من 18 الى 18
والمواصلات خلااص غليت
جاتلكوا اخبارهتغلى تانى ولا ايه
ده انااعمل اضراب ومنزلشى من البيت
كفاية مصاريف الكلية الخارقة
ربنا يسترها

shaimaa samir يقول...

الاخ عمر المصرى
هههههههههههه
حلوة هى خللى الدماغ صاحى فعلا
دعواتكم

الاخ الفاضل جنى
دعواتكم
جزيت الخير

النجم القادم
وفقنا وفقكم الله
ربنا يعديها على خير

الدكتور محمد
يااااااااااااااااااااه
تعليق لحضرتك فى بوستتانى
يارب الاقى حضرتك نزلت بوست جديد
ممكن انا ومجداوية نعمل فرح
ههههههههههه
جزيت الحير
وهناتجد دوما كل جديد
حرقة دم
قريبا فى بوست جديد
بعد الامتحانات
ههههههههههه
(لو حضرتك تحب يعنى )
عندنا الحرق بالكيلو حضرتك عارف
اللى يقدر يشيل بقا

الدعواااااااااااااات

مشتاق لله يقول...

الله يعينكم علي مابلاكم -لعله خير

doctor mohamad يقول...

دايما كانو يقولو لنا و احنا طلبة.. لسه لما تتخرجو هتشوفو الدنيا على حقيقتها _ احمدو ربنا هى المذاكرة دى شغلانة؟ __ بعد التخرج .. أدركت شئ_ يبدو إن " تعب كلها الحياة " إنما الضغط النفسى بايام المذاكرة و الإمتحانات رخم رخااامة.. و أنا أكره الضغط خصوصا النفسى _ ربنا يعينك عليه.

لووماا يقول...
أزال المؤلف هذا التعليق.
لووماا يقول...

السلام عليكم ورحمة الله وبركاته


ربنا يوفقك اختي
بحق اسلوبك مميز وراقي
لا حرمك الله خيري الدنيا والآخرة

ارق تيحيه

shaimaa samir يقول...

الاخ محمد
اشكرككثيرا
ودعواتكم

العزيزةلوما
وانااحب مستعصية
جزاكى الله خيراعلى كلماتك الطيبة
التى اسال الله ان لا يحرمك منهاابدا
ودعواتك جدااااااااا

حمامة يقول...

ربنا معاكم ويوفقكم جميعاً

:)

حبيبـــــــة القمـــــر يقول...

ربنا معاكي ياسكر