الأربعاء، 30 أبريل، 2008

فقـــــــــــــــــــــــط...

تدخل مرسمى
تعجبك تلك الشخابيط اللونية
انك لا تجاملنى

ولكنك احببتها
لانها جزء منـــــــــــى
29-4-2008

بالملائكة فى السماء احلم..
بنبض قطرات المطر الباسمة
على زجاج نافذتى...
بنجوم متدلية كتمائم حافظة...
باغصان تتشابك فى حب
فيلتقيان فى عنان السماء...
عصفوران يتارجحان فوقهما
يهمسان مخافة
غيرة القمر...
اجلس تحت ظلهما معك
فالصمت وقتها
اسمى تعبير...
من يتحمل احلام انثى..؟؟؟

18-4-2008



وسط امطار الشتاء
تحرقنى الشمس بحنانها
تجذبنى الى عالمها
ضحكات العصافير
قهقهات الشجر
ابتسامات القمر
اناس تعتلى البسمة
اعالى جباههم...
فقط
لان روحك بالمكان...
4/2008



شيمــــــــــــــــــــاء سمـــــــــــير

ملحوظة اللوحة الاولى بتاعتى بس والله الاصل الوانها احلى
يا مجداوية متخديش ع الكلام ده خااااااالص انتظرى القادمة ماقبل الامتحانات

هناك 63 تعليقًا:

fenoooon يقول...

اختي الحبيبة

كما عودتينا
هذا الرقي والسمو في المشاعر والاحساس
دائما ما تأخذينا لعالم تفرشيه بالورود ، ورياحين الحب تفوح منه ، الحب بكل انواعه ، والحب بسموه ، وتطوفي بنا في عالمك ، نستنشق روائعك

وما أعجبني ،
التكلم عن مشاعر الحب بشكل راقي ،هادف ، يسمو بأنفسنا ( كما تقولي ) ( ايموشن واحد بيضحك زي اللي ع الياهو )


بارك الله لك في ،
مشاعرك وخيالك ، ورقي احساسك

مجداوية يقول...

حاقرا تانى ارجع محتاجة اقرا تانى

مجداوية يقول...

يا سلااااااااااااااااام
أهو كده الكلام السهل الممتنع حتقوليلى ده ميدخلش دماغك عشان عادى أقولك معلش خدينا على فد عقلنا هو داخل دماغنا احنا ,أنا الشعب ,, رائعة المعانى والأحاسيس ومش عارفة والله ايه عيبها بس هو لازم نكلكعها عشان تبقى متميزة انت ليه سادية كده وبتحبى تذبينا حتبقى انت والحكومة علينا ليه طالما بتعرفى تكتبى حاجات روعة كده لازمتها ايه بس الواحد ياخد المركب ويجدف وأنابيب الاكسجين والزعانف
الحكومة معاها فلوس قد دماغها وبتبخل علينا بيها وانتى عندك المعانى الجميلة دى ومحوشاها لييييييه
المهم فيه بس ملحوظة صغننه فتفوتة المثنى العائد على أغصان تتشابك مينفعش عشان أغصان جمع مش مثنى مش برضه انت قصدك فوقهما يعنى الأغصان ويلتقيان ؟؟؟دى واحدة التانية وتلاقيكى برضه قصداها عند وعشان بس تحيرينا كلمة تحرقنى الشمس بحنانها !! تناقض مش فى محله الحرق بيبقى مؤلم وحنان الشمس لا يتفق مع هذا الأذى الشديد كان ممكن تستخدمى تغمرنى الشمس بحنانحا أو تلمسنى أو تدفئنى كده يعنى ,,بس عشان انت شيماء يبقى هى تحرقنى .يحرقنى لو اعترضت

الرسمة الأولى رسمتك يا سلااااااام وبتقوليها بكل فخر !!!! تبقى أكيد متيمة برسومات فاروق حسنى ,,أنا حالطم ,,المهم الكلام اللى تحتيها هو اللى تحفة ..لوحتك دى فكرتنى بلوحات كان راسمها ولا مؤاخذه بغبغان واتباعت بمئات الدولارات على انها لوحات من الفن الحديث لأحد كبار الفنانين ولم يعلنوا ان الفنان الخطير ده بغبغان اللى بعد انتهاء المعرض !!! بس انتى بقى عملت تكنيك جديد حطيتى علب ألوان مفتوحة واتكعبلتى فيهم فأفرزت هذه اللوحة الرائعة ,,باقولك ايه أنا شايلة المرارة وخلاص معنديش مرارة وانت صح وأنا اكتشفت انى ضيعت عمرى هدر فى الفن المفهوم
ايه الحلاوة دى الله أكبر

ابقى روحى شوفى البوست الجديد وقوليلى رأيك
سلام يا غاليتى
أحبك فى الله وترجميها انت بقى زى ما كتبتها قبل كده

Human يقول...

ضحكات العصافير
قهقهات الشجر
ابتسامات القمر
......
السهل الممتنع يافنانه...الصور دي عجبتني ..واللوح المكتوبه كمان...زي ماقولتلك المره اللي فاتت

سمراء يقول...

شيماء
احييك
استطعت وصف مشاعر من يحب
لانها جزء مني - ينبض قطرات المطر الباسمة على نافذتي
فقط لان روحك بالمكان
احييك مرة اخري
اشكرك على الزيارة
ربنا يوفقك في الامتحانات وبالنجاح ان شاء الله
سمراء

ganna يقول...

كعادتى هاعلق على الحاجات الثانوية الاول
وهى اختيار الموسيقى واللوحات
تحفة جدااااااااااااااا
وفى تناسق بيعمل حالة صفاء وسمو فعلا
وده حتى من قبل قراية الكلام
انا بعد الكلام شفت جانب جميل قوى فيكى كنت حسه بوجوده بس دى اول مرة اشوفه
عجبنى جداااااااا كل تعبير كان لون برتقانى فى التلات فقرات حسيت بالضبط زى مايكون الكلام لعبة حلوة والتعبير الاخير الجون.
وخصوصا من الذى بقدر ان يتحمل احلام انثى؟؟
فعلا ميييييييين

لو سمحتيلى اعلق على تعليق مجداوية بخصوص الصورتين

هو بالنسبة للاغصان الجمع وبعدين التثنية فى يلتقيان
دى صورة جميلة جدااااا
لانى فى طبيعة الشجر بتبقى كل الاغصان بتتشابك فى اسفلها
وكل ما بتطلعى لعنان السماء كل ما بتلاقى الاغصان بتبقى مثلا غصنين او تلاتة متشابكين على حدة
يعنى انا شايفة انها وصلت للنتيجة الاخرانية بعدم المرور على كل مراحل تعانق الاغصان وهى انه غصنين تعانقو فى الاخر
وده فى حد ذاته بلاغة

انا ممكن اكون مش قادرة اعبر كويس بس انا فهمت المعنى ومحستش باستنكار

بالنسبة لتحرقنى الشمس بحنانها
هى تحرقنى ادت لتضتد وقوة فى المعنى يثير الانتباه
قد تكون تغمرنى افضل كمعنى
بس حسيت انى تحرقنى خرجت عن المعنى التقليدى وعملت انتباه منعت القارىء من الاسترسال او انه يمر مرور الكرام على القصيدة
وفى نفس الوقت معملتش تضاد شاذ لانها ببتكلم عن برودة شتاء فحسيت اننا محتاجين كم من الحرارة!

عذرا للاطالة
وجزاكم الله خيرا
مجداوية
زهرتى

بنات صاحبة الجلالة يقول...

تستحقي حقا لقب فنانة مبدعه

اللوحات جميلة اوي وكلمات اروع مشاء الله علي اختيارك هايل

اللوحة الاولي الخاصة بيكي فيها تناسق الوان جميل مناسب

لكي تحياتنا

مجداوية يقول...

السلام عليكم

غاليتى
اسمحيلى أرد على العزيزة جنة
أولا عزيزتى أشكرك على اهتمامك بقراءة تعليقى وهذا يعنى اهتمام منك بما تكتبه الغالية شيماء فيدل انك تتذوقين ما تكتب وليس تعليق مجاملة فقط فأنا احييك بشدة على هذا
ثانيا كما اتفقت مع شيماء أنتذوقنا للفن بيختلف من شخص لآخر ولولا اختلاف أذواق الناس لبارت السلع وصورة تشابك الأغصان صورة بديعة بل انى احسستها بتفسير آخر وهى ان الأصابع هى صوابع اليدان للمحبين ويمكن عشان كده تكلمت عن الأغصان كمثنى ولو كانت تقصد ذلك فالتصوير رائع أيضا ويمكن فى الحالة دى تقبل التثنية لاستخلاص الصورة والمعنى اللى فى بطن شيماء اللى عودتنا اننا لازم نشده ولو كانت تقصد الأعصان كأغصان فالتصوير لا يزال رائعا انا أتكلم هنا فقط من ناحية قواعد اللغة العربية اللى فيها ممكن تتكلمى عن الفرد أو المثنى كجمع لتعظيمه أو مدحه أو بيان عظيم أثره لكن لا يمكن أن تثنى الجمع ,,أما اللوحة المرسومة الأولى فهى بالطبع تناسب تماما الكلمات
وعلى فكرة يا شيماء أنا بأتذوق نوعية اللوحات دى جدا وعملت منها بنفسى خلفيات الحمد لله طلعت جميلة لكن عشان أنا عارفة هى بتتعمل ازاى فأنا لا أصنفها فنا مثل اللوحات الأخرى وسليفادور دالى عمل لوحات معجزة ورائعة بتداخل الأولوان للتعبير عن داخل الانسان لكن مزج الألوان لديه كان فيه تكنيك عالى جدا وخطوط مقصودة وتشعرك بالفعل انك تمرين داخل خلايا الانسان فهذا النوع من الفن له اسثناءات

عظيم تقديرى واحترامى لكماأو لكم
جنة
زهرة
لكما صح ولكم تعظيم لكن مينفعش أقول لكما لك اذا كنت أوجه الكلام اليكما معا

عبدٌ من عباد الله يقول...

واضح انك فيه حاجة معينة عايزه تقوليها
اكن أنا مش فاهم الصورة
بس هيه حلوة

ganna يقول...

مجداوية
مبسزوطة كتيييييييير لكرم اخلاقك وتقبلك تعليقى
جزاكى الله خيرا

انا كان قصدى ان التعليق عن الجمع بالمثنى صح لغويا كقاعدة
لان الجمع انفصل واصبح مجموعات من المثنيات ان صح التعبير
بمعنى انى الاغصان فى مرحلة كانت متشابكة
وفى مرحلة انفصلت وفى مرحلة تعانق كل غصنين فوصلنا لمرحلة التثنية
فهى عدت مرحلة الانفصال وانتقلت للمرحلة التالتة اللى هى النتيجة
وده فى حد ذاته بلاغة
على حد فهمى طبعا
اجمل حاجة بقا والمرحلة اللى فعلا بحس انه فن راقى
ان كل الناس تفهم حاجة مختلفة وكل واحد يتذوق بطريقته ويتبسط
يعنى يشارك الشخص فى صنع ما يتذوقه من خلال فهمه وخبراته الشخصية
وزهرتى فعلاا ناجحة فى ده جدااااااااا

جزاكم الله خيرا
مجداوية
سعيدة بالمناقشة معاكى

زهرتى
امتعتينا

wael kamel يقول...

ولكنك احببتها
لانها جزء منـــــــــــى
بصراحه تعليق بليغ جدا علي اللوحه المرسومه لأنه مهما كان الغموض فيها فلا يمكن أن يشعر بها الا شخص واحد فقط

باغصان تتشابك فى حب
فيلتقيان فى عنان السماء...
قويه جدا اسمحيلي أتضامن مع مجداويه لأنك حينما تستخدمين الأسلوب الأبسط نستقبل فكرتك بهدوء وراحه وبابتسامه

تحياتي لأسلويك الراقي

wael kamel يقول...

وسط امطار الشتاء
تحرقنى الشمس بحنانها

معني رائع فعلا ففي عز البرد يأتي النقيض وهي الشمس لتدفئك بحنانها ليس هذا فقط ولكن أيضا تحرقك من كثرة الحنان لكن أظن لسعة حريق الشمس لن نشعر بها الا بعد مغادرة الحبيب لأن في وجوده لا نشعر بأي شئ
أرفع لكي القبعه
لا ....سأسلمها لكي بالكامل

shaimaa samir يقول...

حبيبتى فنون
كلماتكالعطرة التى تعبق المدونة برياحينها الطيبة
ونشواها الذى لا يستطعمه احد غيرى
احبك فىالله
وجزيتى خيرا لكلماتك الرقيقة
واطرائك الزائد

shaimaa samir يقول...

معلشى هرد عليكى يا مجداوية انتى وجنة مع بعض

بدايةسعيييييييييييييييدة جدابمناقشتكم
ولكن اعتقد يا مجداوية انه يلبس عليكى بعض الامور فى فهممااقصده
بداية
انا احب ما نشرته هذا جدا
وهو ايضا مختلف
ولاابحث ابدا عن التعقيدحتى اكون مختلفة
بتاتا
فالكلمات تخرج منى مرة واحدةدون تفكير عميق او بحث عن معان وكلمات ضخمى

ثانيا
ما اقصده بالمعانى التى احبزها اكثر
هى المعانى المجردة
التى لا علاقة لها بمشاعر بين اثنين احب المعانى الانسانية
وهى ما كانت موجودة فى صراع الحياة الجديدة
واكرر لا اهمل قدر هذة الكلمات فانا احبها ايضا
وهى نوعية مختلفة
ثالثا
بخصوص ملاحظاتك
فقدردت جنة بمااريدة
وعاشت فيها
حبيبتى
اتركى العنان لقلبك فقط وستجدينه يعيش لا تضعى نفسك بداخل بوتقة اننى اكتب الغموض
اواننى اتعبك
ونقطة هامة
انا احبها واحب من يكتب بهذة الطريقة
كماقال الاخ جنى فى تعليقه الماضى
اننى اخرج من حولى من حالة اللاتفكير الى التفكير
ربما هو جاملنى اكثر ولكن مااحبه ان اعيش بكل حواسى بداخل الخاطرة واهم حاستين العقل والقلب
وبخصوص كلغة المثنى والجمع
ساسال عن صحتها باذن الله
وانا لست معك فى موضوع تحرقنى الشمس بحنانها فقط استشعرى لذة حرقة الحنان

رابعا
عن اللوحة
ربما تختلف وجهة نظرنا فى الفن
وربما يبنى كل منا وجهة نظره على اساس دراسته الوافية
وعلى اساس رؤيته وخبرته الخاصة
انا اعحب عملى هذا
واحترمه واحترم كل خط وكل معنى فيه
ومن احترامى له ينتقل الى المتلقين
وليس بالكثير من يتذوق هذا النوع من الفن
اما عن مضوع انك رسمت مثله..!!
استطيع ان اناقشك عند رؤيتى لعملك الفنى الذى تتحدثين من خلاله
هذه ليست شخابيط او الوان وبرميها
هو معنى مجرد
وحالة
وانتى تدركين معنى كلمة حالة بالنسبة للفنان


حبيبتى مجداوية
سعيدة دومابمداخلاتك ومناقشتك
لا حرمناالله منهادوما
ودوما منورانى

جنتى
جزاكم الله خيرا
اولا على متابعتك
ثانيا على استشعارك المعنى
نورتينى بجددددد

shaimaa samir يقول...

human
جزاكم الله خيرا
على هذا المرورالطيب
ربنا يعزك
واشكرك على كلمة فنانة

------------------------

السمراء
حبيبتى
دوما تسعدنى زيارتك
لا حرمنا الله منها
فانت تجيئين بعواصف حانية
دمتى لى حبيبتى السمراء

shaimaa samir يقول...

بنات صاحبة الجلالة
انا مش عارفةاتكلم بصيغة الجمع ولا المفرد المهم انى بنبسط جداا من زيارتكم الكريمة
وبجد بجدسعدت بكلماتك لى
اسال الله ان استطيع حمل كلمة
فنانة مبدعة
واكون دوماهكذا
فى الفن وفى الكتابة
وعلى فكرة الوانها فى الحقيقةاحلى كتيييييير
نورتينى

-------------------------

عبد من عباد الله
جزاكم الله خيرااااااا
المهم ان الكلمات تعجب حضرتك
مش مهم الصورة دلوقتى
دمت بخير

بنت مصريه يقول...

هى الفنون التطبيقيه دى
بيعلموا الرسم ولا الشعر اصل كلامك رقيق قوى واحساسك كمان عالى قوى

بنت مصريه يقول...

تحياتى يا شيمو
واتمنى تنورينى دايما يا قمر

shaimaa samir يقول...

وائل كامل

هو كان فى حاجة بس
ان اللوحة دى مرسومة فى وقت
والكلمات دى كتبتها بعد ما كنت فى معرض كنت فى الاتوبيس ههههههههه
المهم
هو برضو معنى عام
لوحد بيحب حد
هيستشعر كل حاجة بيعملها بيكتبها بيرسمها بيقولها
يمكن جنة فهمت اللوحة لانهاعرفانى ويمكن حبتها لانها عرفانى وفاهمة مشاعرى
ااقصد
ان ممكن اى حد يفهم اللوحة
على الصعيد العام كناحية فنية
ولكننى خصصت الفكرة فى شىء
ان اللى بيحب انسان بيحب اى حاجة هو بيعملها لانها بس جزء منه لان روحه فيها


ربما اختلف معك غى هذة النقطة

لكن أظن لسعة حريق الشمس لن نشعر بها الا بعد مغادرة الحبيب لأن في وجوده لا نشعر بأي شئ

ساتحدث بداية بوجه عام
ليه دايما بنحط كلمة الحب فى بوتقة من الالم والتعب والحزن والسهر
ليه منحسش ان ربنا خلقهولنا عشان نتمتع بيه ونمتع غيرنا
الحب الانسانى
لكل شىء فى الكون
وبالاخص الى مثلا الزوج اوالزوجة
ليه دايما بنحط اننا مش هنحس باللى ادامنا الا بعد الرحيل وطول ما هو جنبنا مش هنحس بيه
ده سببه بيكمن فى كذا نقطة اصلا
هل لانى حطة انى مش هستشعر بيه لانه جنبى ومتعودة الاقيه
ولا لانى بحب اعيّش نفسى فى حزن وحالة المظلوم المجنى عليه ولا... ولا...

ليه منسبشى حرقة الحنان تلسعنا فى وجوده
ليه نحط الحالة السيئة فى المقدمة
عشان نعيش فى حزن
عامة لكل انسان قناعته ورؤيته للاشياء
كل ما قصدته من تلك الكلمات
ان من يحب
يترك نفسه يحب
(اتحدث عن معنى مجرد ان شالله احب القطة)
ولايربط الحب بالوجع
لانه اسمى من اى تعب
معذرة ان اطلت بس سبب استرسالى قراتى لعدةة موضوعات فى كذا مدونة دوما تشعرنى ان الحب شىء قاس
ولكنهم لا يدركون انهم بايديهم من جعلوه قاسيا ووبايديهم يستطيعون ان يجعلوه كما خلقه الله لنا

وبصدق اعظم حب ذاقه قلبى
هو الحب فى الله
ياااااااااااااااااااه ممكن اكتب كتب عنه وعن كل شخصية فى حياتى
احبكم فى الله اخواتى
يا من انتم مرآتى

shaimaa samir يقول...

بنت مصرية
يااه فنون تطبيقية دى
قسم زخرفة
احلى كلية فى الدنيا
وسبب حاجات كتييييير فى حياتى
بحبهاجدااااا
برغم غباء مسئوليها
المهم
انتى نورتينى بجد
ربنا يعزك

Esraa Hamed يقول...

زهرتي الجميلة
الخواطر التلاتة بجد اروع من بعض
كل واحده تاخدك في عالم مختلف و تعيدك لتأخذك التالبة لعالم جديد

رووووعة بجد كما عودتينا

واللوحة بجد فظيييييييييييعة
ما شاء الله بجد تحححححفة
عجبتني جدااا قبل ما اعرف انها بتاعتك
احببتها لأنها جزء منكي
:)))

بجد عجباني جدااااااااا
تسلم ايديكي يا قمرة

آفاق الحرية يقول...

السلام عليكم
فنانة بجد
عايزين نستني معرضك بقي
تحياتي

دواير يقول...

بيتهيألي المفروض أحسدك.....فنانة وكاتبة رائعة..أكيد انسانة حسك مرهف جدا....صحيح انا مابفهمش في الرسم..بس بالنسبة للخاطرة فهي جميلة جد جد جدا...زيارتي الأولى تقبلي مروري...

مجداوية يقول...

غاليتى
اذا كنت أردد كثيرا قول السهل الممتنع وانك تحبين الاختلاف فده نوع من الأفيه اللى كنت أظن انه يضحكنا ويلطف الكلمات والجو ليس أكثر ولكنى أعتقد انى زودتها حبتين وتلطيف الجو زاد فغيم على معانى أخرى كنت أريد ايصالها لك

ولكن ان قرأت ردى على العزيزة جنة ستجدى اننى أكدت ان تذوق الفن يختلف من انسان لآخر ولا أريد اقناعك بوجهة نظرى ولا أريد أن تقنعينى بوجة نظرك ولكننا نتراشق بالكلمات المعارضة نوع من الدعابة ليس أكثر وانا انسانة بسيطة جدا ولا ادعى الفن ولا أصنف نفسى من الفنانين بتاتا ولكنى متذوقة جيدة بشهادة الكثيرين وممن يحترفون الفن ومن غيرهم ولولا انى تذوقت فنك ووجدت فيه جمالا ما تواصلت معك ,,أعمالى الفنية معروضة على جدران وحوائط مدارس سواء هنا أو فى جدة لا ترقى للنقد ولا للتحليل ولا للنقد ولكنها نفذت بكل الاخلاص والتفانى والحب وحتى لو كانت معروضة على جدران المتاحف والمعارض الفنية فأنا لا يهمنى تقييمى كفنانة أبدا ,وأنا ما يهمنى تقييمى كانسانة لهذا فأعمالى الانسانية غير معروضة وتقييمها عند الله تعالى

الدنيا عندى يا زهرتى لا تساوى جناح بعوضة وليس هذا زهدا ولا تقوى ولا فشلا ولكن ادراكا بعد طول تعامل مع الحياة ونجاحاتها وفشلها وزينتها الزائلة

تمتعى بحياتك صغيرتى وافرحى وانجحى ولا تلق بالا لما أقول وسامحينى ان كنت تجاوزت حدى فى النقد أو المزاح

أحبك فى الله دائما وأبدا

جني يقول...

الشيماء
كلما انتقلنا من بوست إلى بوست أيقنت أنني أمام فنانة تعبر برقي ليس بريشتها فقط ولكن بقلمها أيضا .. في الجزء الثاني والثالث من البوست أجد كلمات تشع تفائل وأمل وحياة .. بعكس كثير ممن يتناولون هذا اللون فأجد الصورة قاتمة لا تخلو من اللوعة والحرقة والأنين والبكاء والعويل والنار والعذاب إلى آخر مفردات التعاسة .. أما وقد جعلتي الحب يشرق كشمس الشتاء الرقيقة والأغصان تتشابك والعصاغير تتارجح .. والقهقهات والإبتسامات ..
فأهلا بيكي في مدرسة الأمل والتفاؤل ..
لكي كل التحية ودمت متفائلة
said

صلطح يقول...

السلام عليكم
===========
انا مبحبش المجامله
بس بصراحه انا مش فاهم حاجه من الرسمة الاولى
بس على العموم مش مهم انا اصلا مبحبش الرسم
=============
وجزاكم الله خيرا
==========
وصلطح صلطح يا عم الحاج

wael kamel يقول...

أعظم حب فعلا هو حب الله
لكن أنا لم أقصد هذا الحب بالطبع أقصد حب البشر حب الاخوه حب الاصدقاء الحب بين حبيبين الحب بين زوجين أظن أنه يمكن أن يخطئ أحد الاطراف فيصبح الحب مهدد لكن اذا كان الحب صادقا يعود مره أخري الي طبيعته أما اذا كان الحب علي طريقة كله تمام ياريس لايوجد مشاكل
اعلمي تماما أن هناك شئ خطئ لأن من لم يذق مر الحب لن يشعر ابدا بحلاوته
أسف للاطاله

shaimaa samir يقول...

اسرؤةالجميلة
ربنايكرمك
حبتيهاعشان هى جزءمنى
ايه الشرف العظيم ده
نورتينى يا اسرؤة بكلامك الجميل

-----------------------------

آفاق الحرية
جزاكم الله خيرااااا
امييييييييييييييييييييين
اسال الله ان الاجازةالجاية تسير بخير
والديوان والمعرض يتعملو
وان كان فيه الخير
فسوف يتممها الله على خير

shaimaa samir يقول...

دواير
بداية اهلا بيك كزيارة اولى
اعزكم الله
لا متحسدنيش ادعيلىىىىىىى
جزاكم الله خيرا على كلماتك الطيبة
ومرورك الفاضل

shaimaa samir يقول...

مجداوية
اهوده عيب الكتابة من غير تعبيرات الوجه
وكمان من غير مانكون عارفين بعض
بجد انا مقصدتش اكون سخيفة
يمكن الكلام المرة دى جه جاف مفيهوش هزار فاتضح انى برخم
بس بصدق مقصدتش
وانا بصدق احبك بشكل غير طبيعى
لاننى لمست فيكى انسانيتك
وبصدق لولاهذا مااحببتك كل هذا الحب
معذرة....
حبيبتى
وازاى مالقيش بالا
هالقى بالا ونص كمان
هستنى الخناقة الجاية
وادعيلىىى بجد
لانى مقصرة فى شغلى

احبكفى الله(فونط 90)
تخيلى فونط 90 ده يكون عامل ازاى حجم الشاشة تقريبا

shaimaa samir يقول...

الاخ الفاضل
جنّــــى
دوماتبهرنى تعليقاتكم المتميزةالمتاملة المحللة جيدا للعمل
(هو مش دايما تفاؤل بس الواحد بيحاول اهو)
اتمنى حضرتك تشوف المناقشة بينى وبين الاخ وائل وتعلق لواحببت هذا
فهى تدورحول ما ذكرته فى تعليقك
جزاكم الله خيرا
لهذا المرورالطيب

shaimaa samir يقول...

وصلطح صلطح يا عم الحاج
!!!!!!!!!!!!!!!
ماعلينا
هو الموضوع اصلا خواطر
اماالرسمة فهى حاجة استثنائية
عامةاعجبنى عدم مجاملتك
وشرفنى مرورك الكريم
جزيت الخير

-----------------------

shaimaa samir يقول...

وائل كامل
اطالة ايه بس لا ابدا انابحب المناقشات عامة وانا فىتعليقىالماضى لم اتحدثعن الحبفىاللهغير اننى وضحت انهاعظم شىءذاقه قلبى لكن طول التعليق بتكلم عماتقصده
وقدذكرت فى تعليقى ان لكل شخص رؤيته ووجهة نظره
وانت ترى انه لا بد من مذاق مر الحب
ولكنى ارى
مش فكرة تمام يا ريس وكله زى الفل ولكن
ربماهذا يوجع اكثر مما ان نشعر بمذاقه
اوربما تكون هناك مرارة للحب ولكن لا تكون هى المسيطرة على العلاقة عامة
فتتحول الى اوجاع دائمة
جزاكم الله خيرا لمرورك الكريم....

الفارس الملثم يقول...

احيانا بيكون قوة الاحساس اكثر وصولا للقلوب من مئات الكلمات , فحملت كلماتك هنا احساس ساحق في لمسه للمشاعر , وتشبيهاتك هنا رائعة بحق وغير اعتياديه ...

بس ليا نقدين عندك مانع , ده حقي الدستوري مممممم

بالنسبه للوحه بصراحه مفهمتهاش بس يمكن فعلا يكون الاصل مختلف ممممممم

ثانيا التعبير ده
تحرقنى الشمس بحنانها

عجيب وغريب واستوقفني كثيرا كيف يرتبط الحرق مع الحنان ؟؟؟

بجد بسعد بزيارتي لمدونتك لانها مختلفة جدا ومتيزة جدا

تحياتي
محمد

و القادم....أجمل يقول...

الحب يفعل الكثير
:)
البوست راااااائع جدا
بجد و الله

المدونة كلها تحفة
من الموسيقى و اللوحات و التعليق عليها
و رسمك فوق شكله جميل
:)

ربنا يوفقك و يكرمك

إحترامي و حبي

:)

rainbow يقول...

الصديقة الجميلة شيماء

سيبدو اعتدارى محتاجا الى اعتدار لتأخرى المعيب
لكنى اطمع فى تسامحك الكريم

شيماء انت مبدعة بحق هناك وصلة من اثير دهبى اخدتنا فى رحلة مع الثلاث مقاطع وحروف وردية حال دون جمالها ان ادهب واتركها دون اعادة قرائتها اكثر من مرتين ادكر على سبيل المثال لا الحصر : بنجوم متدلية كتمائم حافظة

ثم دلك التساؤل الجدلى العميق المثير فى آن : من يتحمل احلام انثى !! لا احد عزيزتى الا هى تتحملها عبئا خالدا قد تشرك فيه الحبيب بعض الوقت ولكن للاسف ليس كل الوقت !0

اما تعبير : تحرقنى الشمس بحنانها فهو بوتقة صهرتى فيها عدة معان مختلفة تحتاج لوقفة مع النفس ثم معك ! اعجبنى حد الهوس صدقينى

واخيرا : اناس تعتلى البسمة اعالى جباههم فقط
رائع شيماء .. فقط هده اداة من ادوات التوقف عند المعنى وتمحيصه ثم الحزن لان بسمتهم نشعر بها ولا نراها

انت رائعة

حبى

هدى

rovy يقول...

انا سعيده جدا لانى اتعرفت على فنانه مثلك .. مدونتك جميله قوى وتدل على انك فنانه موهوبه وان شاء الله نحضر لك معارض قريبا.
مشاعرك واحساسك راقيه وتسمو بفن ورقى بالنفس البشريه .
وفقك الله وبارك فيكى
تحياتى
rovy

حطم القيود يقول...

الله عليكى

مبدعة انتى ...وصف وتعبير...كلماتك في منتهى الرقي.... استمرى وبارك الله فيكى

انا بردو برسم تشكيلي

وفرقت معايا فنون جميله على حاجه بسيطه

في انتظار المزيد...تحياتى

رئـــــيسـة حزب الأحلام يقول...

جميلة جدا الكلمات واوعى القمر يغير من العصافير وبعدين مايطلعشى تانى

احمد ابوالعلا يقول...

جميل مارسمت وما كتبت ياشيماء ونسألك المزيد
اسمحيلى استغل شعبية مدونتك
تضامنا مع حركة كفاية اقدم شعارات مصورة للنشر على المدونات لمن يرغب
http://7arfwaw.blogspot.com/

shaimaa samir يقول...

الفارس الملثم

فحملت كلماتك هنا احساس ساحق في لمسه للمشاعر

هذا اطراء زائد جزاكم الله خيراااا
اما عن اللوحة فدعك منها
وبالنسبة للتعبير
يمكنك قراءة رد الاخت جنة
او الحبيبة rainbow
انا من اسعد بزيارتكم الكريمة

shaimaa samir يقول...

والقادم اجمل

حبيبتى
جزاكى الله خيرا على كلماتك الطيبة
ودوما يارب تجدين ماتحبين
نورتينى بجد يا جميلتى

shaimaa samir يقول...

يااااااااااااااااه
هدى فى مدونتى
عود احمد
بجد مفتقداكى
واد ايه كلماتك نزلت برداوسلاماعلى قلبى كم كان يهمنى معرفة رايك بشدة
وفى الاشياء التى مضت ايضا
ولكن القادم افضل باذن الله بتواجدك وتعليقك ونقدك
حبيبتى
اراكى اذبتى مشاعرك بداخلى
فاخترت ما احب
وفسرتى باحساس مرهف
جزاكى الله خيرااااااا
دعواتك لى دوما
فانالا انساكى صدقا من دعائى
احبك فى الله

shaimaa samir يقول...

حبيبتى
جزاكى الله خيراااا
تكفينى تلك الجملة من فنانة مثلك

مشاعرك واحساسك راقيه وتسمو بفن ورقى بالنفس البشريه

انتى وهدى مرة واحدة
لا كنت هموت منكو
ربنا يكرمك
ودايما منورانى
جزاكىالله خيرا
وربنا يتقبل دعوتك

shaimaa samir يقول...

حطم القيود

حبيبتى جزاكى الله خيرا
وانتى فعلا فنانة مدونتك جميلة
وحطمىالقيود وارسمى وانطلقى
وملكيش دعوة بالكليات
هى بتثقل اكثر
لكن لمن يعرف كيف يستفيد
ومستنية اشوف اعمالك

-----------------------------

رئيسة حزب الاحلام

اهلا بيكى نورتنيى
لا متخافيش ع القمر
هو صبووووووور الى ابعد الحدود

-----------------------------

الفنان احمد ابو العلا

تشرفت بمدونتك المختلفة حقا
وتفاجات بها بصدق
اعزكم الله
مروركم اسعدنى
جزيت الخير

آخر العنقود يقول...

مش عارفة اقول ايه اكتر من اللى اتقال
مشاعرك جميلة وبتنم عن شخصية هادية ورومانسية
ربنا يكرمك يارب ياشيماء
وبجد سعيدة بتعرفى على مدونتك
وان شاء الله مش تكون الاخيرة
وبتمنى دوام التواصل

دمتى فى حفظ الله

جني يقول...

زمان علمونا في الصحة النفسية مصطلح الماسوشية أو الماسوخية ومعناه أن يتلذذ الشخص من تعذيب الأخرين له بعكس السادية وهو من الأمراض النفسية التي يجب أن تعالج .. وأنا أرى أن كل من يطلب اللوعة والعذاب والمرارة والحرقة ونار ياحبيبي نار وحبك نار وعلشانك انت انكوي بالنار .. كل هؤلاء قد نالهم نصيب من الماسوشية يجب أن يتخلصوا منه ..
فيه أجمل من الحب الذي يسموا بصاحبه إلى الفرح والسرور والحبور والتفائل والأمل والحياة والضحكات والابتسامات .. أليست هذه التعبيرات أجمل من الكلمات الأخرى التي تدعوا للكآبة والحزن ؟؟
تحياتي
said

nonoymm يقول...

حبيبتي اشهد الله العلي العظيم اي احبك في الله واحبك الذي احببتني فيه حبيبتي
دائما كلماتك رقراقة سهلة ممتنعة
ابلغ ما لفت ظري
ان الصمت ااسمى تعبير
لان هذا من شيمي
بارك الله فيكي بس انا ما بفهمش في التجريد خالص اعذريني
تحياتي

صريح أوي يقول...

السلام عليكم
أنا فعلا فرحان لاني اكتشفت المدونة دي .. صحيح اكتشفتها متأخر جدا
لكن لي طبعا اسبابي ..
إحساس عالي
أنا فعلا كنت مفتقد أي إنسان يرجعني تاني لزمن الفن الي كنت انا واحد من هواته
جزاكم الله خيرا

shaimaa samir يقول...

اخر العنقود
ربنايعزك يا حبيبتى
نورتينى والله
وطبعا باذن الله فيه تواصل
دمت بخير

--------------------------

الاخ الفاضل
جنى
لا هوالموضوع موصلشى لكدة
هههههههههههههههههههه
ماسوشية ايه بس خلتنى ااقعد ساعتين ااقرا مقالات عنها
بس ده اكتر واصدق وافضل مقال على الاطلاق عنها
http://www.allteb.com/vb/showthread.php?t=18332

جزاكم الله خيراااا لانى بحب اعرف الحاجت دى
وجزيت الخير لردكم
بس زى ماقلت لحضرتك
مش ماسوشية ولاحاجةده راى مش اكتر
نورتنى بصدق

shaimaa samir يقول...

نونو
حبيبتى وحشتينى جدا
ربنايكرمك يا حبيبتى
والله احبك فى الله
هو الصمت رااائع
فى بعض الاوقات واعتقد ان البوح راااائع فى اوقات اخرى
مجرد اتزان بين الحالتين واى وقت يستلزم الكلام واى وقت يستلزم الصمت
نورتينى بصدق

حـــــدوتـــــة يقول...

السلام عليكم
اختى الفاضلة اية كدة
كلام جميل ومعانى واضحة لاتحتاج الى معجم
خواطر ناعمة ومشاعر رقيقة
احسنت
انا اسف بالنسبة للرسم انا مبحسوش خالص يعنى المشكلة فيا انا

سلالالالالالالالالالالالالام

ghoneem يقول...

اهلاً بيكي

ghoneem يقول...

أول مرور أرجو تقبله

عجبني جداً المدونة بتاعك فيها ذوق عالي جداً ومجموعة صور أروع من بعض

وعجبني جدا بوست التاج فعلاً راااااائع

الصورة اللي حضرتك رسمتيها في بوست فقط ألوانها حلوة وطبعاً في موضوع في الصورة بس انا مش فاهم ايه الموضوع بالظبط
ممكن حضرتك طبعاً توضحي عشان أستفيد أكتر من الفن ده

أشكر ليكي تشريفك عندي ورأيك للي أسعدني جداً

تحياتي

بالتوفيق......

مجداوية يقول...

السلام عليكم

غاليتى
انا جيت اكتر من مرة عشان اشوف الشات ده ملقتش حاجة بس كل شوية تقوليلى انا حاعمل الشات انا حاعمل الشات

فييييييييييين الشات ؟؟ تشربى شات قصدى شاى ؟؟

doctor mohamad يقول...

الله ع التعبير ده .. أعجبنى جدا..)إنك لا تجاملنى .. ولكنك أحببتها.. لأنها جزء منى( أشهد إنه تعبير صادق جدا .. صدق تعبيرك هنا و واقعيته يذكرنى بالصدق الموجود بقصائد أحمد مطر و إن اختلف الموضوع.. .. .. أدهشنى جدا تعليق مجداوية و أعجبنى الصراحة . . فقد قالت ما أردت قوله وما كنت قد نويت قوله فعلا حين علقت على )فوقهما و يتشابكان( فهى حقا لغويا ماتمشيش _وخلينى أضيف _ إلا ف حالتين إتنين :أولا: إذا كان الفاعل محذوف تقديره )غصنان( ويكون أصل الجملة حينها )فيلتقيان غصنان فى عنان السماء..عصفوران يتأرجحان فوقهما( وحذفت )غصنان( لأنها ربما تفهم من السياق .. ثانيا:أن تكون التثنية فى )فيلتقيان( عائدة على المحبين الإثنين.. وما ذكر الملائكة السماويه ولا نبض قطرات المطر وابتسامتها ولا تمائم النجوم و لا الأغصان المتشابكة إلا كوصف راقى و مقدمة هادئة و تكوين رائع للجو المحيط بالمحبين )مثنى(و ف هذا الجو يلتقيان)أى المحبان( و يتأرجح فوقهما عصفوران..وهذا التفسير هو الأقرب لذهنى... و ربما ده اللى جعل الأخت جنه تقول :أنى فهمتها و المعنى وصل و هى صادقه لإن المعنى وصل لى أيضا .. أرجو أن تتقبلى تعليقى المتواضع .. و بجد ربنا بيحبك إن ناس أمثال الأخت مجداوية و جنة و غيرهم)بودى أذكر الكثير(ممن يقرأو بتمعن و ينقدو بصدق سلبا و إيجابا.. بيتابعوا مدونتك و بدون مجاملة باحييكم ع إقامة نقاش هايل بتعليقاتكم حتى صارت جزء من الموضوع.

منى يقول...

الرسم بالكلمات
ده اسم كتاب جميل بحبه
وشايفه انه تعليق مناسب جدا للبوست ده
اللى خدنى معاه لعالم تاااانى
تحياتى بقدر ما امتعتنى

shaimaa samir يقول...

الاخ الفاضل
حدوته
نورتنى والله
جزاكم الله خيرااااااااا
وبالنسبة للرسمة لا ولا يهم حضرتك
مفيش مشاكل خالص
ويمكن المشكلة فيا
جزاكم الله خيراااااا

-----------------------------

الاخ الفاضل غنيم

جزاكم الله خيرا لزيارتكم الكريمة
وبالنسبة للوحة
فلا عليك منها
دمت بخير

shaimaa samir يقول...

دكتور محمد
جزاكم الله خيراااااااا على كلماتك وتعليقك ونقدك وانااحب هذا...
وبجد جزاكمالله خيرا على مدونتك الرائعة التى كانت مختفية عنا
ومعذرةلعدم تعليقى
سارد قريبا
اسال الله ان لا يطيل سفرك وغربتك
دمت بخير

---------------------------

الحبيبة منى

رائع اسم الكتاب وانا بصدق
استشعر انى كتاباتى متاثرة بالفن جداااا
ممكن تجبيلى اسم الكاتب بعد اذنك
واتمنى يكون العالم التاننى اللى روحتيه
عجبك
نورتينى بصدق

xezo يقول...

احساس صادق


كلمات رقيقة وبسيطة

شكرا على البوست الرائع

دكتور حر يقول...

احب هذا النوع من الكلمات
القصيرة التي تحوي بين طياتها الكثير

انظر لهذا الاسلوب
وأقف أمامه كاعاجز

*******
اكثر ما شدني في المدونة
التاج القديم

رائع ومتعوب فيه الصراحة

تحياتي

appy يقول...

لوحك رقيقه وكلامك ارق
بس صعب فهمه قوى يعنى السهل الممتنع
هههههههه تسلم ايديكى

shaimaa samir يقول...

xezo

جزاكم الله خيرا لهذا المرور
اعزكم الله

---------------------
دكتور حر

زيارتك شرفت بها المدونة بصدق
وكلماتك اطراءزائد
جزيت الخير
واتفضل التاج لو حضرتك عاوزه طبعا
---------------------------
ابى
يا هلا يا هلا

صعب فهمه
مممممممممممممممممممممم
اناجتلى حساسية من كلمةالسهل الممتنع
بس والله جميل
الواحد عاملكو انجازات اهو
هههههههههههههههههههههه
نورتينى
مش تتاخرى عليا