الاثنين، 30 يونيو، 2008

افراااااااااااح ... بتفرّح




حلمك يا شيخ علام


هكذا نطقها ابى بابتسامته التى اعشقها وبنظرته الهادئة التى تذيبنى خجلا منه!!


بعد حدوث هذا الموقف


___________________________


فلاش باك للساعة 12.30 النهاردة




قومو يا بهوات كفاية نوم الساعة 12.30 حرام عليكو


استيقظت على عجل واتمتم انا حلمت ان امينة ولدت


والدى يالا حضرى لينا الفطار


انا عايزة الموبايل


والدى خير هتحضرى الفطار ديلفرى مثلا


انا.. لا هكلم امينة انا حلمت انها ولدت


والدى بطلى ربنا يهديكى


انا ..والله مش هاخد وقت


ترن ترن ترن


محدش رد


ترن ترن رتن لتانى مرة


صوت رجل فى موبايلها


ممكن امينة


لا معلشى اصلها ولدت النهاردة


هاااااااااااااااااااااااااااااااااااااااااااااااا


تلك الشهقة بالابتسامة والضحك الهستيرى


فقلت له اصلى كنت بحلم انها ولدت وقلت اطمن عليها


طبعا والدى وجدتى جنبى


بابا بابتسامته


وجدتى بتلك الضحكة التى ترن فى قلبى


وتمسح على وتقول بهزار


بركاتك يا شيخة شيماء


ههههههههههههههههههههههه


اللهم ادم على هذة النعمة


لانها ليست المرة الاولى


ولكن تلك المرة كانت احلاهم


نيجى بقا للفرح المفترض نعمله للنونو






مبروووووووووووووووووووووووووك يا مينو(امينة)


ويالا خليه يكبر بسرعة عشان يساعدنا فى المشروع السنة الجاية


امينة اتخيلك وانتى ام حانية تضمينه بحب


هنيئا لك هذا الشعور


والان الجنة تحت اقدامك


فاعملى لها واجعلى ولدك يعمل لها


احبك فى الله يا حبيبتى


واحنا معاكى ومش تقلقى


هنربيه كلنا معاكى


وممكن نيجى نطبخلك اينعم انتى فى جسر السويس


بس مش مهم


فدااااااكىىىىىىىىىىىى




بالمرة بقا نهنى بدل ما اعمل موضوع تانى


وتزهقوا منى






ميروووووووووووو(اميرة)


تلك الرقيقة


الحيبيبة


تعرف الحق بصدق


من اقرب الناس الى قلبى


احبك اميرتى الجميلة


مبارك العقد يوم 4/7


والبناءفى نهاية الشهر


مبااااااااااااااااااااااارك عليك


واسال الله ان يتمم الامر على كل خير


ولاتجعلى للشيطان ثغرة


احبك جميلتى




اما الااااااااااااااااااااااااااان فمع الخبر اللى بقا هموت ويحصل


يالاااااااااااا يا


سارااااااااااااااااااااااااااااااااااااااااا


سارة العقد بتاعها فى منتصف الشهر ايضا باذن الله


وعلى الله تعمله مع التوقيع بتاعى


ياااه يا ساااااارا


طبيعى مش لاقيه كلام ااقوله


انتى روحى الساكنة


دوما تقولين اننى اكتب ما تشعرين به


ودما استشعر انك الحبيبة التى تسكن القلب


احبك فى الله بقووووووة


ولا تعلمين مدى سعادتى عندما علمت انك تتابعيننى فى صمت


الان علمت ان الحديث احيانا يفيد عن الصمت


احبككككككككككككككككككك وعلى كل خير




هؤلاء كانوا اصدقائى بالقسم




اماالان


فالى ابنتى
جهاااااااااااااد


نعم ابنتى هكذا اناديها وتنادينى بوالدتى
خانت امها واتخطبت
ههههههههههههههههههه


ولكن ما اجملها خيانة


سعدت كثييييييييرا حبيبتى


تصغريننى بسنتان


ولكن اشعر انك الاقرب منى روحا


ولم ارى احد فهمنى بسرعة مثلك


دوما اقرا تلك الورقة التى ارسلتيها لى فى خجل


اقسم لك اننى اقراها كثيراااااااااااااااا ربما استطيع ان اسمعها لك


احبك فى الله


ولن انسى تلك الدمعات التى كانت فى عينك عندما حضنينى بعد طول فترة غياب


ولم انطق شيئا من فرط مشاعرك احبك فى الله جداااااااااااااااااااا


ومبارك عليك خطبتك ايتها الحبيبة




والان مع شقيقتى كما اسمتنى رشا


سالى


خطبة سالى فى منتصف الشهر القادم ايضا


وبرضواحذر ان يكون فى نفس معاد التوقيع


ههههههههههههههههههههههه


سالى ايتها الحانية


كدت من فرط مشاعرك لى ان اغرق فيها


اتذكرك من اول يوم فى الكلية


اتذكر عندما يقولون نحن الاقرب


اتذكراشيائا ان هممت فى كتاببتها ربما لا انتهى


احبك فى الله


ولا تعلمين وقع خطبتك على قلبى


احبك فى الله بصدق


واسال الله لك الثبات والاخلاص


فمنك يا سالى انهل الاخوة






وبرضو


عايزة ااقول لمريم وسمية


يا بختكو هتعمللو عمرة


يااااااااه


اسالكم الدعاء


وطبعا ورقة الدعاء لازم تخدوها قبلها


انى اُحذركما










احبكم فى الله جميعااااااااا


واسال الله ان يريح قلوبكم


ويجعلكم دوما فى طاعة لازواجكم


و يكونو سببا فى دخولكم الجنة






الخميس، 26 يونيو، 2008

مع الاطفال.. كل يوم خميس(1)





خالتو انتى متكوسة(متجوزة)
لا مش متكوسة
طيب مكونتيس بتيكى ليه
(مكونتيش بتيجى ليه)
معلشى كنت بمتحن
طيب نكحتى
مش عارفة.. ممكن تدعيلى
حاضر







هكذا بدا ترحيبها بى عند دخولى المسجد
تلك الهادئة التى كانت لا تنطق الا ببضع الكلمات لى السنة الماضية
كبرت سما .. سنة
واصبحت ودودة اكثر من الاول لى
لا تتحدث مع احدغيرى
كنت سعيدة بهذا جدا
وكانه الاصطفاء
وكنت احاول جاهدة ان تندمج وتكون اكثر صحبة
الان هى اجمل واجمل
ومازالت تحب اللون الاورنج بقوة... مثلى







نرجع للسؤال العظيم
ما علاقة غيابى بالزواج
سما ثلاث سنوات فقط
حيرنى هذا التفكير جدا
لِم لم ياتى فى ذهنها اننى ادرس
او اننى مريضة مثلا
فهوالاقرب لها
لن اطيل التفكير فى هذا الامر
كل ما شعرت به
اننى سوف اكسر لها تلك القاعدة الراسخة عندها
ان الزواج يبعد الناس عن احبائهم
ولعلها هى التى ستكسر لى القاعدة
وتكوّن فى فكرى حقيقة لم اكن اعلمها من قبل




اطفال المسجد رحبوا بى ترحيبا ..شعرت بوجودى فى الحياة
احبكم بكل ذرة فى كيانى
لانكم انقى شىء فى الوجود
دعونى انهل منكم
الحب
والصدق




المسجد الاحد والثلاثاء والخميس
ولكنى وعدتهم ان سيكون كل خميس يوم به رسم والوان
وسيكون كل يوم خميس على مدونتى موضوع لهم
الى انتهاء الاجازة ان شاء الله




واحنا بنرسم
انا.. هرسملكو بنت انا برسمها انتو عارفين انى بشتغل فى الرسوم
اه مش حضرتك فى كلية الرسم
لا انا فى كلية التصميم
انا بقول لسما هجبلك الفيلم بتاعى تتفرجى عليه
هما ...ايه ده هو حضرتك بتشتغلى فى ام بى سى ثرى
ولا اسبيس تون
طب بتعملى انهى برنامج
بيطلع امتى
احنا كلنا عايزين نشوف الفيلم
احم
اه طبعا (وانا عارفة انهم لوشافوه ممكن يتيريقوا لبكرة)
هههههههههههههه




اللى هيسمّع كويس هو اللى هيرسم
اوكى هنحفظ والله كويس ونجيب عشرة كمان




سما وانا بغسلها ايديها اللى كانت غرقانة باللون الاورنج
انا بحبك وعايزة احفظ معاكى قران
حاضر يا حبيبتى
وعنيه بدات تدمع
الكلمة هذة لم اسمعها للمرة الاولى
سمعتها كثيرااا
كنت اموت احراجا من المعلمات الفضليات الاخريات
واموت ذوبا عندما اقول لطفلة مينفعشى.. عشان انتى مع ابلة فلانة
هستاذن منها
لا مينفعشى
وانا بمووووووووت




على باب المسجد
واقفين مثلا 5 دقايق كل شوية نقول مع السلامة ونقف
بصراحة انا مكونتش عايزة اروح
ولا هما برضو
اما انى اروح معاهم
او يجوا معايا
بس كالعادة
مشيوا يمين وانا شمال



وافترقنا
وموعدنا يوم الاحد
وللاسف انا لا اُحفِظهم
دعواتكم بصدق
لعدم حدوث اية مشاكل
اعزكم الله
واسال الله الاخلاص....




ادى صورتين ع الماشى...



هنا اول ما بداو يرسموا

شايفين سما مفعوصة بينهم ازاى مع انى قايلالهم متزنقوهاش

بس هى جميلة فى كل الحالات



ودى رسومتهم كلها لانى جيبالهم صفحة كبيرة .....طبعا اللى فى النص الشخصية بتاعتى
وهتلاقوا فن سيريالزمى على اليمين من تحت باللون الاورنج لانها بتعشقه
دى الفنانة الكبيرة سما
دعواتكم

الثلاثاء، 24 يونيو، 2008

احادث نفسى...


شيماء





الا تصبرين





( كلا ان معى ربى سيهدين)






الاثنين، 23 يونيو، 2008

هكـــــــــــــذا ... رددت


الصمت... ليس هو حالى ولكن مدلولات الصمت هو حالتى

الصمت.. لا يعنى كثرة الكلام او قلته
فهو اعمق من حصره ما بين هذا وتلك



ربما تصمت.. ولكنك تقول الاف الكلمات فى صمتك

وربما تتحدث بالاف الكلمات ولكنك لا تقول شيئا


الصمت... لغة..

من يدركها فقد ادرك...............



_اشكر كل من شاركنى الراى_فى موضوعى السابق

جزيتم الخير جميعا

ودعواتكم

الجمعة، 20 يونيو، 2008

هام.. وضرورى.. وعاجل

انهيت بفضل الله امتحاناتى اول امس.. وانتهيت
اسالكم الدعاء بصدق
اود منكم امرا عاجلا
فرايكم هام بالنسبة لى الى اقصى درجة
وعاجل الى اقصى درجة ايضا
ساعطيكم اسماء لديوان شعر
وعليكم اختيار الافضل والاكثر جاذبية لكم
وللعلم ان كل الاسماء توافق المحتوى فلا قلق من هذة الناحية
باذن الرحمن
انين طفلة
انامل طفلة
خربشات
انا و الانا
عندما ينجب الدمع
احمال الليل
ولكامل العلم ايضا ان اول ثلاثة هى حالة عامة ولا توجد قصيدة
بالداخل تحمل اسمها
اما الثلاثة الباقيين توجد باسميههم
انتظركم
هذا للاهمية القصوى
وعلى عجل كبير

السبت، 14 يونيو، 2008

رسالــــــــــــــة اليهم...



عندما تشعر بغربة
بين احضان نفسك
وعندما يكونون هم نفسك
فيخذلونك هم
فتخذل نفسك
ماذا تنتظر؟؟؟



ظننت اننى اصلح نفسى
عندما اتحور
وانسى حزنى منهم
وغضبى مما يفعلون بى
اهناك افضل من التسامح
ولكنى لم اكن اعلم
اننى اؤد
مشاعرى



عندما اقلمت نفسى لهم
ولم يفهموا يوما شخصى
انسلخت من بين اعضائى
لاكون معهم
واكون لهم
ولكنى تفتت
فمن يلملم اهاتى
غير نفسى



عندما علمت ان اللوم يؤلمهم
قررت ان اصمت
والوم نفسى لايلامهم
فبقيت مع المى

عندما تستشعرون ان حزنى
هوسبب همى
وان كآبتى الدائمة
مصدرها نفسى
ايقنت انكم لن تفهموننى يوما
فقد كنت احفر فى صخر



لم ترونى يوما
كما راينى من لا ابالى لهم
فقد احبونى اكثر
من ذواتهم
ولكنى كنت
اريد حبكم انتم



تهزئون من دموعى
التى تجرى بسرعة البرق
تعتبرونها ضعفا
لوفهمتنونى
لادركتم انها جزء من تكوينى



عندما تقرأون كلماتى
وتلوحون بايديكم
اننى مجنونة
وان ما اشعربه
ليس سوى خرافات بداخلى
يزيد هذا ايقانى
بكل ما شعرت به
احبكــــــــــــــــــــــــــــم
حد الجنون
ولاننى ولانكم بشر
ولان الذى بيننا ميثاق غليظ
وامر آلهى"واصبر"
نطوى حزننا فى طيات النسيان
واظل احبكم بل واكثر
11-6-2008


الاثنين، 9 يونيو، 2008

قلوبنا الخضراء....


بعد معاناة ووقت وجهد(جهييييد)
وفى وسط12 مادة تانين
بفضل من الله
قدرنا نخرج افلام لا باس بها
مبسوطين من خوض التجربة جداااااااا
حاجة رااائعة ان الانسان يستشعر
انه بيشوف جزء من هدفه حتى لو فى نظرالناس صغير
وبالاخص فى رسوم متحركة
لانك بتفكر فى كل حاجة
قصة وهدفها
تصميم شخصيات
خلفيات
تحريك
مونتاج
اخراج
كل حاجة فيها
وعشان الحاجات دى كلها تتكاتف مع بعضها وتديك الاحساس اللى انت عاوزه
محتاج منك انك تشتغل بقلبك وروحك
مش بفكرك بس
لان الروح هى اللى هتوصل
الفيلم ده جزء من قلبى وعقلى











دعواتكم دوما....

معلشى نسيت اوضح ان المشروع اسمه
اخضر فى اخضر
يعنى الدكتورة رمت لنا الكلمة دى
وقالتلنا فكرواااااااااا
بس خلاص...
فى فيليمن كمان هتلاقوهم عند الفجرية
على جنب عندى

الجمعة، 6 يونيو، 2008

لقااااااااء ولا ع البال ولا ع الخاطر؟؟



بما انى عايزة ابدا مذاكرة بقا عشان كدة هزار
بس مينفعشى اليوم ده يعدى كدة
من غير حتى ما ااقول كلمتين ع الماشى
لكن طبعا احساسى بيه مش ع المااشى خااااااااالص


بعد ماعرفت قدرا الساعة 2.30 بالليل ان فى تجمع النهاردة الجمعة
بجد مش هحكى كتير عن القدر اللى خلانى اعرف الميعاد
سواء من انى اكون صاحية للميعاد ده
اوادخل مدونة الغالية هدى
لا وادخل التعليقات كمان
واشوف فاتيما بتقولها ع الميعاد
ششششششششششششششششششششششششششش
خلاص ننسى الكلام ده



والحمد لله رحت
وبرضومش هتكلم عن التيسير اللى حصل
انى اروحلهم
لكن الحمد لله وصللللللللللللت
والمفاجاة
انا مش عارفة حد غير فاتيما
وحتى فاتيما
مش علاقتنا قوية
اكنى رايحة متطفلة كدة
(ايموشن بيهرش فى راسه)
ماعلينا
انا ليا هدف معين
اتعرف ع الناس بجد
واشووووووووووووف فاتيماااااااااااااااااااا
(ايموشن خجلان)
وفعلاا شفت الناس
الاغرب ان كل المدونات اللى شوفتهم
مش بنعلق عند بعض اصلا
واعتقد ان دى انطلاقة وشىء مختلف
الكل بيعلق عند التانى وبعدين يتعرفوا
انا لا نتعرف بعد كده نركز مع بعض
جديدة دى والله
(ايموشن مبين سنانه وبيضحك)



شفت


بنت خيخة
بشقاوتها اللى حساها حد فى 3 اعدادى مثلا
احم من غير ضرب
وهزارها وبساطتها خالص فى التعامل

وابنها الامور اللى مش شبهها قصدى شبها هههههههه


آبى
العاقلة المجنونة
وكلامها الجامد
الجديد على اذنى
احم احم هههههههههههههههههه


بنوتة مصرية
وبنتها اللى علاطول نايمة ولا اكنها بتذاكر
بنوتة مصرية
حسيت فيها بجدعنة غير طبيبعة فعلا صدقت انها سمت نفسها كدة
هى فعلا بنوتة مصرية


شاهى
الرقيقة صاحبة الاحساس المرهف
والوقار


دوبااا
ان ااااااااااااان وهى بتكلم ابنها الفظيع
كان شكلها تحففففففة
بخلاف انها كانت بتتناقش بحرقة اوى واتخضيت اول ما جيت هههههههههه
بس هى فيها من الجدعنة كتييربرضو ودمها خفيف خاالص


المفقوعة مرارتها
كارثة هى واولادها
بجد كنت متخيلاكى زى ما قلتلك ههههههه بس طلعتى خالص
وبعدين ده انتى مش شقية كدة زى المدونة
اولاااادك ربنا يباركلك فيهم
احمد وعمر
انا مش عارفة ترتيب الاسماء كل اسم مين الكبير والصغير
زهايمر بعيد عنك

(ايموشن مكسوووف)
بس رهيييييييييييييب ابنك اللى فمه زى الفرولايه ده
وحنين خااااالص جداااااااااااااااااا
ممكن يستنانى اخلص بس واجى اخطبه؟؟


سومة
برضو اهدا فى الواقع عن المدونة خالص
هى المدونة افراج ولا ايه
ايموشن بيفكر بعمق
وطبعا قرينة الفن


نبضات
جت قبل ما امشى
بس مبسوطة انى شفتها جدااااااااااااااا



فاتيماااااااااااا
ااااااااااااااااااااااااااااااااااااه والف اااااااااااااااااه
يا شقيقة الروح 2 (ايموشن بيغمز)
بصى انا مش هتكلم
لان الكلام مش هيعبر
فاسمحيلى انى اسكتتت



بجددددددددددددددددددددددددددددد
انتو حلويييييييييييين خااااااالص ومبسوطة والله انى عرفتكو جدااااااا
ومحدش يزعل من اى كلام
لانكو احلى من اى كلااام فعلا
والقاعدة معاكو تحفففففة وياريت تتكرر تانى كتيييييييييييير
انى احبكم جميعا فى الله
البوست الجاى هيكون هدية للاطفال والكبار ايضا
مشروع رسوم متحركة


ادعولى اذاكر بقاااااااااااااااااا

الاثنين، 2 يونيو، 2008

بعودتنا إلى الإسلام تعلو راية الحب ....



كثيرا ما تاخدنا احوال دنيانا
عن اشياء كنا نفعلها
وربما حتى نفكر بها ان لم نستطع فعلها المهم اننا كنا نظل احيائا بتفكيرنا فى امرها
ولكن لا شىء يبقى على حاله
حتى التفكير فى امر بعض الاشياء
تضيق بنا الحياة فننساها
وربما تضيق بنا انفسنا فنتناساها


لا اريد شعارات ناصحة
وعلامات وكلمات عن التفاؤل والحياة والامل
بل هو واقع نحياه
نتذوق حلوه
ومره


نتعلم منه ونتدبر فيه
وفى اثناء دوامة تلك الحياة
تظهر لنا تلك الرسائل
او تلك المنبهات الربانية
التى تشعرك بوجودك فى الحياة
لن اطيل اكثرمن ذلك
فقد اخذتنى الامتحانات طوال الاسبوعين الماضيين
لا اثقل اللوم على نفس
فقد كان الوقت بصدق ضيقا
ولكنى اسام تلك الحياة التى تضغطنا
واحاول دوما مقاومة ضغطها على بتلك المناهج التى الونها بفكرى حتى اتقبلها
احاول المقاومة بضغطى اكثر فى امور الحياة التى تشعرنى بالحياة
ولكنى مااستشعرت يوما انها ضغوط
لانها نابعة من ذاتى
فى وسط غيوم امتحان اليوم
استيقظت على هذا النشيد
الذى ابكى بكائى
وكم اشعرنى بتقصيرى
هذا البيت


من الأزمات يغمرني شعور أنني السبب
فلو أني إلى الإسلام حقا كنت أنتسب


كلما اسمعه يقشعر له بدنى
واشعربتقصيرى الشديد نحو الله
سواء لنفسى
او فى دعوتى الى الله


ده النشيد










ودى كلمات النشيد


رسول الله لا يرضيك هذا الحال للعرب = و لا يرضيك ما يبدو من الإعلام في الغرب

و لكن حسبنا يرضيك عودتنا إلى الدرب = بعودتنا إلى الإسلام تعلو راية الحب


من الأزمات يغمرني شعور أنني السبب = فلو أني إلى الإسلام حقا كنت أنتسب

لما طالت محمدنا رسوم صاغها الكذب = ولا عمت محافلنا دعاوى عافها الأدب


إلى الإسلام يا دنيا لقد أعددت أولادي = لإن قصرت في ديني فقد هيأت للهادي

شبابا أولعوا حبا به ، إذ نورهم بادي = لكل الناس مذ صاغوا من القرآن أحفادي


فهيا يا شباب الجيل للإسلام نظهره = بأجمل حلة حتى يشد الناس منظره

فإن ينشد للإسلام من قد كان ينكره = رأيت الناس في حب لدين الحق تنشره


واسال الله ان يلاقى شيئا فى قلوبكم...